ᓄᒃᑎᖅᑕᐅᓂᖅ ᓱᕈᓯᐅᓪᓗᓂ: ᐊᑕᐅᓯᕐᒧᑦ ᐊᖑᑎᒧᑦ ᐊᑐᖅᑕᐅᓂᑯᑦ – ᐃᓚᖓ 2

ᖁᐊᕐᓵᕐᓇᖅᑐᖅ, ᒪᒥᓴᖅᑕᐅᙱᑦᑐᖅ ᐋᓐᓂᐊᕐᓇᖅ

ᒐᕙᒪᑐᖃᒃᑯᑦ ᖃᐅᔨᓴᕈᑎᖓ ᐅᒥᐊᕐᔪᐊᖅ ᓰ.ᑏ. ᕼᐊᐅ, ᓴᕿᔮᖅᑐᖅ ᐋᕿᒋᐊᖅᑕᐅᓯᒪᔪᒥᑦ ᐊᔾᔨᙳᐊᒥᑦ 1950-ᖏᓐᓂᙶᖅᓯᒪᔪᖅ. ᖃᔅᓯᒐᓴᖕᓄᑦ ᐊᑑᑎᖃᖅᑐᖅ ᓰ.ᑏ. ᕼᐊᐅ ᐃᓚᖓᒍᑦ ᐋᓐᓂᐊᕕᒃᑎᑑᖓᓚᐅᕐᐳᖅ, ᑭᓯᐊᓂᓕ 1953 ᐊᐅᔭᖓᓂᒃ, ᐳᕙᖕᓂ ᐊᔾᔨᓕᐅᕈᑎᖓ ᐊᔪᓚᐅᕐᓯᒪᖕᒪᑦ. (ᐊᔾᔨᙳᐊᖁᑎᒋᔭᐅᔪᖅ)

By ᒫᑰᓯ ᐹᑦᓴᐅᖅ

1953-ᒥᑦ ᐊᒻᒪ 1055-ᒥᑦ, ᒐᕙᒪᑐᖃᒃᑯᑦ ᓄᒃᑎᖅᑎᑦᑎᓚᐅᕐᓯᒪᖕᒪᑕ 90 ᐅᖓᑖᓃᑦᑐᓂᒃ ᐃᓄᖕᓂ ᐃᓄᒃᔪᐊᒃᒥᑦ ᐊᒻᒪ ᒥᑦᑎᒪᑕᓕᒃᒥᑦ ᖃᐅᓱᐃᑦᑐᒧᑦ ᐊᒻᒪᓗ ᒍᕆᒡ ᕼᐋᐳᒧᑦ ᐅᕙᓂ Ellesmere Island-ᒥ. 1956-ᓗ 1962-ᓗ ᐊᑯᓐᓂᖓᓂ, ᐃᓚᒌ ᒍᕆᒡ ᕼᐋᐳᒦᑦᑐᑦ ᓄᒃᑎᓚᐅᕐᓯᒪᔪᑦ 40 ᒪᐃᓕᒥ ᐅᖓᓯᖕᓂᓕᖕᒧᑦ ᐊᐅᓱᐃᑦᑐᒧᑦ.

ᒫᑰᓯ ᐹᑦᓴᐅᖅ ᐃᓄᒃᔪᐊᒃᒥᐅᑕᖅ, ᒫᓐᓇ ᐅᑭᐅᖃᓕᖅᑐᖅ 77-ᓂ, ᐃᓚᖃᖅᖢᓂ ᐊᑖᑕᖓᓂᒃ, ᐊᓈᓇᖓᓂᒃ, ᓇᔭᖓᓂᒃ ᐊᒻᒪ ᐱᖓᓱᓂᒃ ᓄᑲᖏᓐᓂᒃ, ᓄᒃᑎᖅᑕᐅᓚᐅᕐᓯᒪᖕᒪᑕ ᖃᐅᓱᐃᑦᑐᒧᑦ 1953-ᒥᑦ.

ᐅᑯᓇᓂ ᑎᓴᒪᐅᓕᖓᔪᓂ ᐅᓂᒃᑳᓕᐊᓂ ᑐᓂᔭᐅᓂᑯᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᐹᑦᓴᐅᖅ ᐃᖅᑲᐅᒪᕗᖅ ᐊᒃᓱᕈᓚᐅᕐᓯᒪᓂᖏᓐᓂᒃ ᐃᓅᖃᑎᖏᓪᓗ ᖁᑦᑎᒃᑐᒧᑦ ᓅᑕᐅᓵᕐᓯᒪᑎᓪᓗᒋᑦ.

ᐅᑭᐅᖃᓚᐅᕐᓯᒪᔪᖓ 12-ᓂ ᓅᑕᐅᑎᓪᓗᑕ. ᖁᕕᐊᓇᕈᓘᔭᓚᐅᕐᓯᒪᔪᖅ ᑐᓴᕋᑦᑕ ᐊᕐᕌᒎᖕᓂ ᒪᕐᕉᖕᓂ ᐊᓯᐊᓂ ᓄᓇᒦᓐᓂᐊᕐᓂᑦᑎᓐᓂ, ᓂᕐᔪᑎᖃᐅᖅᑐᒥᑦ ᐊᖑᔭᒃᓴᓂᒃ ᐊᒻᒪ ᑎᕆᒐᓂᐊᕐᔪᖕᓂᑦ ᒥᑭᒋᐊᒐᒃᓴᓂᒃ.

ᑐᒃᑐᑕᖃᑦᑎᐊᕐᓂᕋᖅᑕᐅᓪᓗᓂ ᐊᒻᒪ ᐊᒥᓱᓂᒃ ᐅᒥᖕᒪᒃᓂᑦ ᐊᒻᒪ ᐊᒥᓱᓂᒃ ᓇᑦᑎᕐᓂᒃ ᐊᒻᒪ ᐊᐃᕕᕐᓂᒃ ᐊᒻᒪ ᓇᓄᕐᓂ.

ᐊᖑᓇᓱᖃᑕᐅᖃᑦᑕᕐᓯᒪᓂᓐᓂ ᓄᓇᕙᒃᖢᑕ ᐊᒻᒪᓗ ᐱᓇᓱᐊᕈᓯᑲᓪᓚᖕᓂ ᑕᕿᒐᓴᖕᓂᒡᓗ ᐊᐅᓪᓚᕐᓯᒪᕙᒃᖢᑕ, ᑕᐃᒪᓕ ᖁᕕᐊᓱᑦᑎᐊᒻᒪᕆᓚᐅᕐᐳᖓ ᑐᓴᖅᑎᑕᐅᒐᑦᑕ ᒐᕙᒪᒃᑯᑦ ᖃᓄᐃᓕᐅᕈᒪᓂᖏᓐᓂᒃ.

ᐃᓅᓱᒃᑑᓪᓗᖓ ᐊᖑᓇᒃᑐᒃᑎᓪᓗᖓ ᐃᓱᒪᕙᓚᐅᕐᐳᖓ ᐊᒥᓱᓂᒃ ᑎᕆᒐᓂᐊᕐᔪᖕᓂ ᒥᑭᒋᐊᕐᓂᐊᖅᑕᓐᓂᒃ, ᐊᒻᒪᓗ ᑐᒃᑐᐃᑦ ᓇᓄᐃᓪᓗ ᐊᖑᓇᓱᒃᐸᒡᓗᒋᑦ.

ᐊᒻᒪᓗ, ᐅᑎᕐᓂᐊᖅᖢᑕ ᐊᕐᕌᒎᖕᓂ ᒪᕐᕉᖕᓂ. ᐃᓱᒪᒃᑯᓪᓕ ᐃᓅᓱᒃᖢᖓ, ᑖᓐᓇ ᐊᐅᓪᓚᕐᓯᒪᓂᖅ ᐱᐅᓂᖅᐹᖑᓂᐊᕋᓱᒋᓪᓗᒍ, ᓄᓇᑦᑕ ᐊᓯᐊᓂ ᖃᓄᐃᓕᐅᑲᑕᒡᓗᑕ. ᑕᐃᒪᐃᓚᐅᕐᓯᒪᔪᖅ.

ᐅᓇ ᐊᔾᔨᙳᐊᖅ, ᐊᔾᔨᓕᐅᕐᑕᐅᓂᑯ 1956-ᒥᑦ ᒐᕙᓇ ᔭᓄᕈᓪ ᕕᓐᓇᓐᑦ ᒫᓯᐅᑉ ᐅᑭᐅᕐᑕᖅᑐᕐᒥᑦ ᐳᓚᕋᖅᑎᓪᓗᒍ, ᓴᕿᔮᖅᑎᑦᑎᔪᖅ ᖃᓄᐃᓕᖓᔪᓂᒃ ᐃᒡᓗᖃᖃᑦᑕᓚᐅᕐᓯᒪᓂᖏ ᐃᓄᒃᔪᐊᒃᒥᑦ ᐃᓄᐃᑦ ᖃᐅᓱᐃᑦᑐᒦᓕᓛᖅᑎᓪᓗᒋᑦ (ᐊᔾᔨᙳᐊᖅ ᒑ ᓚᓂ/NFB/ᐅᖃᓕᒫᒐᖃᕐᕕᒃ ᑲᑎᕐᓱᒐᐃᓪᓗ ᑲᓇᑕᒥᑦ)

ᑭᓯᐊᓂᓕ ᐅᑎᓚᐅᙱᑦᑐᒍᑦ ᐊᕐᕌᒎᒃ ᒪᕐᕉᖕᓂ, ᑕᐃᒪᓐᓇ ᐱᓂᐊᕐᓂᕋᖅᑕᐅᓯᒫᓪᓚᓚᐅᖅᖢᓂ ᒐᕙᒪᒃᑯᓐᓂ. ᐊᕐᕌᒍᒐᓴᒻᒥᕆᐊᓗᐃᑦ ᐊᓂᒍᖅᑎᓪᓗᒋ ᑐᕝᕕᒋᓚᐅᕐᓯᒪᕙᕋ ᐊᖏᕐᕋᕆᓂᑯᒐ.

ᐱᓯᒪᓚᐅᕐᓯᒪᒋᕗᖓ ᐋᓐᓂᐊᒥᒃ ᖁᐊᕐᓵᕐᓇᖅᑐᒥᑦ ᐊᒻᒪᓗ ᐊᐃᑦᑑᑎᒋᓪᓗᒍ ᐅᕙᑦᑎᓐᓄ ᐃᓚᒌᓄᑦ ᐊᒻᒪᓗ ᖁᐊᕐᓵᓇᕈᑎᐅᓯᒪᓪᓗᓂ ᐃᓚᓐᓄᑦ ᐊᒥᓱᓂᒃ ᐊᕐᕌᒍᓂ.

1952 ᐅᐱᕐᖔᖓᓐᓂᒃ, ᐊᕐᕌᒍ ᓯᕗᓂᐊᒍᑦ ᓄᑖᐅᕝᕕᒃᑕ, ᓄᕙᓕᓚᐅᕐᓯᒪᕗᖓ ᐊᒻᒪ ᓄᕙᖃᕐᔪᐊᖅᐸᒃᖢᖓ, ᐊᒻᒪᓗ ᓄᕙᒐ ᐊᐅᖕᒥ ᐃᓚᖃᓚᐅᖅᐸᒃᖢᓂ. ᑖᓐᓇᓗ ᐅᕙᓐᓄ ᖁᐊᕐᓵᕐᓇᓚᐅᙱᑦᑐᖅ, ᐊᒻᒪᓗ ᐅᖃᐅᓯᕆᓚᐅᕐᓯᒪᓇᒍ ᑭᓇᑐᐃᓐᓇᒧᑦ.

ᐊᓈᓇᒪ ᖃᐅᔨᓕᓚᐅᕐᓯᒪᔮᖓ ᑕᑯᒐᒥ ᑎᕝᕗᐊᖅᑕᓐᓂᒃ ᐊᐳᑎᒧᑦ ᓵᑦᑎᐊᖓᓂ. ᐊᒃᓱᐊᓗᒃ ᑕᒪᑐᒧᖓ ᐃᓱᒫᓗᖂᔨᓚᐅᕐᓯᒪᔪᖅ ᑕᑯᔭᒥᓄᑦ ᐊᒻᒪ ᑮᓇᖓ ᐃᓱᒫᓗᒃᑐᖅ ᓇᓗᓇᕈᓐᓃᖅᖢᓂ.

“ᐳᕙᒡᓗᑐᐃᓐᓇᕆᐊᖃᖅᑐᑎ” ᑕᐃᒪᓐᓇ ᐅᖃᑐᐃᓐᓇᖅᖢᓂ. ᑭᖑᓂᐊᒍᑦ ᐅᖃᖃᑦᑕᓚᐅᕐᓯᒪᔪᖅ ᖃᓪᓗᓈᑦ ᓄᓇᖓᓄᐊᑐᐃᓐᓇᕆᐊᖃᕐᓂᓐᓂᒃ ᒪᒥᓴᖅᑕᐅᔭᖅᑐᕐᓗᖓ. ᐊᓱᐃᓚ ᑕᐃᒪᐃᒡᒍᖕᒪᑦ, ᓱᓕᓚᐅᕐᓯᒪᔪᖅ.

ᐃᓚᖏᑦᑎᒍᓪᓕ ᐅᓂᒃᑳᓕᐊᖑᓯᒪᓪᓚᕆᒃᑐᓂᒃ ᓴᕿᑉᐸᓪᓕᐊᔪᓂᒃ, ᐅᒃᐱᕆᔭᐅᓚᐅᕐᓯᒪᔪᖅ ᐋᓐᓂᐊᖃᓕᕆᐊᒃᓴᑦᑎᓐᓂᒃ ᖃᓪᓗᓈᓂ ᖃᓂᒋᔭᖃᑲᑕᓗᐊᒧᑦ ᑖᒃᑯᐊᓗ ᐳᕙᒡᓗᖕᓇᒥ ᐱᓯᒪᓪᓗᑎ ᐊᒻᒪ ᐊᐃᑦᑐᕐᓯᑲᑕᒃᖢᑎᒃ ᐅᕙᑦᑎᓐᓂ.

ᑭᓯᐊᓂᓕ ᐅᕙᑦᑎᓐᓂᙶᕆᐊᒃᓴᖓᓂ ᐃᓱᒪᓚᐅᕐᓯᒪᙱᑦᑐᖅ ᐱᒋᐊᖅᑎᑦᑎᓂᑰᒋᐊᒃᓴᑦᑎᓐᓂᒃ ᐊᒥᓱᐊᓗᖕᓂ ᐳᕙᒡᓗᓕᖅᑐᓂᒃ ᐊᕐᕌᒍᒐᓴᐅᓂᐊᕐᑐᓂᒃ.

ᔪᓚᐃ 1953 ᓄᖑᓕᖅᑎᓪᓗᒍ, ᐅᒥᐊᕐᔪᐊᖅ ᓰ.ᑏ. ᕼᐊᐅ, ᑖᓐᓇᓗ ᐊᖏᕐᕋᕆᓂᐊᖅᖢᑎᒍᑦ ᐱᓇᓱᐊᕈᓯᕐᓂᒃ 6-ᓂ ᑎᑭᓚᐅᕐᓯᒪᔪᖅ ᐃᓄᒃᔪᐊᒃᒧᑦ. ᐋᓐᓂᐊᕆᐊᒃᓴᑦᑎᓐᓂ ᖃᐅᔨᓴᖅᑕᐅᓪᓗᑕ, ᑭᓯᐊᓂᓕ ᐳᕙᕗᑦ ᐊᔾᔨᓕᐅᖅᑕᐅᙱᖢᑎᒃ.

ᐊᕐᕌᒍᒐᓴᐃᑦ ᐊᒥᓱᑦ ᐊᓂᒍᖅᑎᓪᓗᒋᑦ ᖃᐅᔨᓕᓚᐅᕐᓯᒪᔪᖓ ᐳᕙᖕᓂ ᐊᔾᔨᓕᐅᕈᑎ ᓱᕋᒃᓯᒪᓚᐅᕐᓯᒪᓂᖓᓂᒃ, ᐊᒻᒪᓗ ᐃᖃᓗᐃᑦ ᖄᖏᖅᑎᓪᓗᑎᒍᑦ ᐊᔾᔨᓕᐅᖅᑕᐅᓕᑕᐃᓐᓇᖅᖢᑕ.

ᑭᓯᐊᓂᓕ ᐋᓐᓂᐊᕆᔭᕋ ᖃᐅᔨᔭᐅᓚᐅᕐᓯᒪᙱᑦᑐᖅ. ᐅᕙᑦᑎᓐᓂ ᓇᓕᐊᒃ ᐋᓐᓂᐊᙱᓐᓂᕋᖅᑕᐅᖕᒪ, ᐃᓚᒌᓕᒫᑎᒍᑦ ᖃᓱᒻᒪᕆᓚᐅᕐᑐᒍᑦ, ᓲᖃᐃᒻᒪ ᐃᓱᒪᓚᐅᕐᓯᒪᖕᒪᑕ ᖃᓪᓗᓈᓄᑦ ᐋᓐᓂᐊᕐᕕᓕᐊᕆᐊᖃᕆᐊᒃᓴᓐᓂᒃ.

ᐊᒻᒪᓗ ᓂᕆᐅᒃᑲᓐᓂᓕᖅᖢᖓ ᓄᑖᒧ ᓄᓇᒧᑦ ᑎᑭᓐᓂᐊᕐᓂᑦᑎᓐᓂᒃ. ᑭᓯᐊᓂᓕ ᑎᕿᓯᒪᓕᓵᖅᖢᑕ ᖁᑦᑎᒃᑐᒧᑦ, ᐋᓐᓂᐊᕐᐸᓪᓕᐊᓕᓚᐅᕐᓯᒪᕗᖓ.

ᐊᒃᓱᕈᕐᓇᖅᓯᓪᓗᓂ ᐊᓂᕐᓵᖅᑐᕆᐊᒃᓴᖅ

ᐅᓐᓄᒃᑯ, ᐊᑖᑕᒐᓗ ᕿᒻᒥᕗᑦ ᕿᒥᕆᓕᖅᑎᓪᓗᑎᒍ ᐊᖑᓇᓱᐊᓪᓚᓚᐅᖅᖢᑕ ᐅᓪᓗᖓᓂ, ᒥᕆᐊᑲᑕᓕᓚᐅᕐᓯᒪᔪᖓ ᐊᖏᔪᕈᓗᖕᒥ ᐊᐅᖕᒥ ᐊᒻᒪ ᐊᓂᕐᓵᕈᓐᓇᐃᓪᓕᓚᐅᑲᒃᖢᖓ ᐊᐅᖕᒥ ᒥᕆᐊᑲᑕᖕᓂᓐᓄᑦ ᐊᒻᒪ ᕿᖓᒃᑯ ᐊᐅᓕᖅᖢᖓ.

ᐃᖅᑲᐅᒪᔪᖓ ᐊᓂᕐᓵᖅᑐᕋᓱᒻᒪᕆᒃᑐᖓ, ᑭᓯᐊᓂᓕ ᐃᒡᒋᐊᕋ ᐊᐅᖕᒧ ᓯᒥᔭᖢᓂ ᐊᒻᒪᓗ ᐊᓂᕐᓵᕈᓐᓇᐃᓪᓕᓗᖓ ᐃᓗᒻᒧ ᓯᓚᒻᒧᓪᓘᓐᓃ.

ᐃᖅᑲᐅᒪᔪᖓ ᐊᑖᑕᒪ ᐅᓂᐊᑲᒻᒪᒃᑖᖓ ᐊᐳᑎᒃᑯ ᐊᒻᒪ ᐃᒡᓗᕕᒐᑦᑎᓐᓄᐊᕈᑎᓪᓗᓂᖓ ᐊᒻᒪ ᐃᒡᓕᕐᒧᐊᖅᖢᓂᖓ ᐹᒻᒪᖓᓪᓗᖓ. ᑐᓄᖓ ᐸᑦᑕᒃᑐᑲᑕᓕᖅᖢᓂᐅᒃ ᐊᒃᓱᕈᕈᓘᔭᖅᖢᓂ.

ᑕᐃᒪᐃᓕᐅᕐᑎᓪᓗᒍ, ᐊᓈᓇᒐ ᐃᐳᐃᑦᑐᒥᒃ ᐃᓕᓯᓪᓗᓂ ᑎᕝᕗᐊᕐᕕᒋᓂᐊᖅᑕᓐᓂᒃ. ᐃᖅᑲᐅᒪᔪᖓ ᐃᔾᔪᖄᓗᖕᒥ ᐊᐅᖕᒥ ᖃᓂᓐᓂᙶᖅᑐᒥᑦ ᐊᒻᒪ ᕿᖓᒃᑯᑦ, ᐃᓱᒪᓕᖅᖢᖓ ᑐᖁᓂᐊᓕᖅᑐᖓ.

ᑭᓯᐊᓂᓕ ᐊᑖᑕᒪ ᐃᒡᒋᐊᕋ ᑭᓱᖃᕈᓐᓃᖅᑎᖢᓂᐅᒃ ᑐᓄᒃᑯ ᐸᑦᑕᒃᑐᑲᑕᐃᓐᓇᖅᖢᓂᖓ.

ᑭᖑᓂᑦᑎᐊᖓᒍᑦ ᐊᑯᓂᐊᓘᖂᔨᒐᓗᐊᖅᖢᓂ, ᐊᓂᕐᓵᖅᑐᕈᓐᓇᕐᓯᔾᔫᒥᓪᓗᖓ ᐊᒻᒪᓗ ᐊᓈᓇᒪ ᐊᐅᒍᓐᓃᖅᑎᖢᓂᖓ ᐊᐳᑎᒥ ᖁᖓᓯᒪ ᑐᓄᐊᓃᑎᑦᑎᓪᓗᓂ. ᐊᓕᐊᓇᐃᖑᓚᐅᕐᑐᖅ, ᓯᓂᓕᕐᖢᖓ ᓯᓂᑦᑎᐊᖏᓐᓇᓕᖅᖢᖓ ᐅᓐᓄᐊᓕᒫᖅ.

ᐅᐱᕐᖔ

ᓯᕗᓕᖅᐹᒥ ᐅᐱᕐᖔᖅᓯᐅᕐᖢᑕ ᓄᑖᒥ ᓄᓇᒥ ᐊᔾᔨᐅᓚᐅᕐᓯᒪᙱᑦᑐᖅ ᐃᓄᒃᔪᐊᒃᒥᐅᑕᕐᓄᑦ, ᑕᑯᓚᐅᕐᓯᒪᙱᒻᒪᑕ ᓯᕿᓂᕐᒥ ᐅᐃᔾᔮᖏᓐᓇᖅᑐᒥᑦ ᐊᒻᒪᓗ ᐅᓐᓄᖃᕈᓐᓃᖅᖢᓂ ᑕᕝᕙᓂ ᓄᓇᒥ ᐊᔾᔨᐅᙱᑦᑐᐊᓗᖕᒥᑦ. ᑲᒪᓚᐅᕐᓯᒪᔪᒍᑦ ᓯᓚᐅᑉ ᐊᓯᙳᖅᐸᓪᓕᐊᑲᑕᖕᓂᖏᓐᓂᒃ.

ᐅᐱᕐᖔᖑᕐᓂᖓᑦᑕᐅᖅ ᑎᒥᓐᓄ ᓴᖏᒃᑎᕚᓪᓕᕈᑎᒋᓚᐅᕐᑕᕋ ᐊᒻᒪᓗ ᑕᕿᓂ 6-ᓂ ᐃᒡᓗᒦᕌᓪᓚᓚᐅᖅᖢᖓ ᐊᓂᔪᓐᓇᕐᓯᑕᐃᓐᓇᖅᖢᖓ ᓯᓚᓗ ᓇᐃᓪᓗᒍ ᒪᒪᕐᒦᒃ.

ᑖᓐᓇ ᓰ.ᑏ. ᕼᐊᐅ ᖃᐅᓱᐃᑦᑐᒥ ᐊᐅᓪᓚᖅᑎᓪᓗᒍ ᓯᑎᐱᕆ 1954-ᒥ, ᐃᑭᒪᓚᐅᕐᓯᒪᔪᖓ ᖃᓪᓗᓈᑦ ᐋᓐᓂᐊᕕᖓᓄᖓᐅᓪᓗᖓ ᐊᓈᓇᒪ ᐃᓱᒪᒋᔭᐅᖅᑕᖓᑎᑐᑦ ᐊᕐᕌᒎᓚᐅᕐᑑᖕᓂ ᒪᕐᕉᖕᓂ.

ᑕᐃᔅᓱᒪᓂ, ᖃᐅᔨᒪᓚᐅᕐᓯᒪᙱᑦᑐᖓ ᐃᓚᒃᑲ ᑕᑯᒃᑲᓐᓂᕐᓂᐊᕆᐊᒃᓴᖏᓐᓂᒃ, ᑭᓯᐊᓂᓕ ᑲᑉᐱᐊᓱᓚᐅᙱᑦᑐᖓ ᐊᒻᒪ ᖁᕕᐅᓱᕈᓘᔭᒻᒪᕆᒃᖢᖓ ᑕᑯᓂᐊᕋᒪ ᖃᓪᓗᓈᑦ ᓄᓇᖓᓂᒃ.

ᐅᒥᒃᑰᓕᖅᖢᖓ ᓇᓗᓇᖅᑐᒥ ᖃᓄᖅ ᓯᕗᓂᒃᓴᖃᕐᓂᐊᕐᓂᓐᓂᒃ. ᐊᕐᕌᒍᒐᓴᒻᒥᕇᑦ ᐊᓂᒍᓚᐅᕐᑐᑦ ᑐᑦᑎᓪᓗᖓ ᓄᓇᕕᓂᑐᖃᓐᓄᑦ.

ᐅᖃᓕᒫᕈᓐᓇᕐᑕᓯ ᐃᓚᖓ 3 ᒫᑰᓯ ᐹᑦᓴᐅᖅ ᐅᓂᒃᑳᖓ ᐱᓇᓱᐊᕈᓯᐅᓂᐊᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ.

Share This Story

(0) Comments

Join the Conversation

Your email address will not be published. Required fields are marked *

*